Akusalacittaṃ
4. Tattha katamaṃ kāmāvacaraṃ ?
Somanassasahagataṃ diṭṭhigatasampayuttaṃ asaṅkhārikamekaṃ , sasaṅkhārikamekaṃ , somanassasahagataṃ diṭṭhigatavippayuttaṃ asaṅkhārikamekaṃ , sasaṅkhārikamekaṃ
M0.2 , upekkhāsahagataṃ diṭṭhigatasampayuttaṃ asaṅkhārikamekaṃ , sasaṅkhārikamekaṃ , upekkhāsahagataṃ diṭṭhigatavippayuttaṃ asaṅkhārikamekaṃ , sasaṅkhārikamekanti imāni aṭṭhapi lobhasahagatacittāni nāma . 5. Domanassasahagataṃ paṭighasampayuttaṃ asaṅkhārikamekaṃ , sasaṅkhārikamekanti imāni dvepi paṭighasampayuttacittāni nāma .
6. Upekkhāsahagataṃ vicikicchāsampayuttamekaṃ , upekkhāsahagataṃ uddhaccasampayuttamekanti imāni dvepi momūhacittāni nāma .
7. Iccevaṃ sabbathāpi dvādasākusalacittāni samattāni .
8. Aṭṭhadhā lobhamūlāni , dosamūlāni ca dvidhā .
Mohamūlāni ca dveti , dvādasākusalā siyuṃ .