Ārammaṇapaccayo
37. Micchattaniyato dhammo aniyatassa dhammassa ārammaṇapaccayena paccayo – ariyā micchattaniyate pahīne kilese paccavekkhanti , pubbe samudāciṇṇe kilese jānanti .
Micchattaniyate khandhe aniccato … pe … vipassanti .
Cetopariyañāṇena micchattaniyatacittasamaṅgissa
V2.432 cittaṃ jānanti .Micchattaniyatā khandhā cetopariyañāṇassa , pubbenivāsānussatiñāṇassa , yathākammūpagañāṇassa , anāgataṃsañāṇassa āvajjanāya ārammaṇapaccayena paccayo .(1)
Sammattaniyato dhammo aniyatassa dhammassa ārammaṇapaccayena paccayo – ariyā maggā vuṭṭhahitvā maggaṃ paccavekkhanti .
Cetopariyañāṇena sammattaniyatacittasamaṅgissa cittaṃ jānanti .
Sammattaniyatā khandhā cetopariyañāṇassa , pubbenivāsānussatiñāṇassa , anāgataṃsañāṇassa
T2.489 , āvajjanāya ārammaṇapaccayena paccayo .(1) 38. Aniyato dhammo aniyatassa dhammassa ārammaṇapaccayena paccayo – dānaṃ datvā sīlaṃ samādiyitvā uposathakammaṃ katvā taṃ paccavekkhati , pubbe suciṇṇāni paccavekkhati , jhānā vuṭṭhahitvā jhānaṃ paccavekkhati , ariyā phalaṃ paccavekkhanti , nibbānaṃ paccavekkhanti , nibbānaṃ gotrabhussa , vodānassa , phalassa , āvajjanāya ārammaṇapaccayena paccayo .
Ariyā aniyate pahīne kilese paccavekkhanti , vikkhambhite kilese paccavekkhanti .
Pubbe samudāciṇṇe kilese jānanti .
Cakkhuṃ … pe … vatthuṃ … aniyate khandhe aniccato dukkhato anattato vipassanti , assādenti abhinandanti , taṃ ārabbha aniyato rāgo uppajjati … pe … domanassaṃ uppajjati .
Dibbena cakkhunā rūpaṃ passati , dibbāya sotadhātuyā saddaṃ suṇāti , cetopariyañāṇena
M2.373 aniyatacittasamaṅgissa cittaṃ jānāti , ākāsānañcāyatanaṃ viññāṇañcāyatanassa … pe … ākiñcaññāyatanaṃ nevasaññānāsaññāyatanassa ārammaṇapaccayena paccayo .Rūpāyatanaṃ cakkhuviññāṇassa … pe … phoṭṭhabbāyatanaṃ kāyaviññāṇassa ārammaṇapaccayena paccayo .
Aniyatā khandhā iddhividhañāṇassa , cetopariyañāṇassa , pubbenivāsānussatiñāṇassa , yathākammūpagañāṇassa , anāgataṃsañāṇassa , āvajjanāya ārammaṇapaccayena paccayo .(1)
Aniyato dhammo micchattaniyatassa dhammassa ārammaṇapaccayena paccayo – rūpajīvitindriyaṃ mātughātikammassa … pitughātikammassa … arahantaghātikammassa …
T2.490 ruhiruppādakammassa ārammaṇapaccayena paccayo .Yaṃ vatthuṃ parāmasantassa micchattaniyatā khandhā uppajjanti , taṃ vatthu micchattaniyatānaṃ khandhānaṃ ārammaṇapaccayena paccayo .(2)
Aniyato
V2.433 dhammo sammattaniyatassa dhammassa ārammaṇapaccayena paccayo – nibbānaṃ maggassa ārammaṇapaccayena paccayo .(3)