1. Uppalavaṇṇātherīgāthā
224.
‘‘ Ubho
M0.404V0.330 mātā ca dhītā ca , mayaṃ āsuṃ [ ābhuṃ ( sī .)] sapattiyo ;Tassā me ahu saṃvego , abbhuto lomahaṃsano .
225.
‘‘ Dhiratthu kāmā asucī , duggandhā bahukaṇṭakā ;
Yattha mātā ca dhītā ca , sabhariyā mayaṃ ahuṃ .
226.
‘‘ Kāmesvādīnavaṃ
P0.145 disvā , nekkhammaṃ daṭṭhu khemato ;Sā pabbajjiṃ rājagahe , agārasmānagāriyaṃ .
227.
‘‘ Pubbenivāsaṃ jānāmi , dibbacakkhuṃ visodhitaṃ ;
Cetopariccañāṇañca , sotadhātu visodhitā .
228.
‘‘ Iddhīpi me sacchikatā , patto me āsavakkhayo ;
Chaḷabhiññā sacchikatā , kataṃ buddhassa sāsanaṃ .
229.
‘‘ Iddhiyā
T0.472 abhinimmitvā , caturassaṃ rathaṃ ahaṃ ;Buddhassa pāde vanditvā , lokanāthassa tādino ’’[ sirīmato ( syā . ka .)].
230.
‘‘ Supupphitaggaṃ upagamma pādapaṃ , ekā tuvaṃ tiṭṭhasi sālamūle [ rukkhamūle ( syā . ka .)];
Na cāpi te dutiyo atthi koci , na tvaṃ bāle bhāyasi dhuttakānaṃ ’’.
231.
‘‘ Sataṃ sahassānipi dhuttakānaṃ , samāgatā edisakā bhaveyyuṃ ;
Lomaṃ na iñje napi sampavedhe , kiṃ me tuvaṃ māra karissaseko .
232.
‘‘ Esā antaradhāyāmi , kucchiṃ vā pavisāmi te ;
Bhamukantare tiṭṭhāmi , tiṭṭhantiṃ maṃ na dakkhasi .
233.
‘‘ Cittamhi
M0.405 vasībhūtāhaṃ , iddhipādā subhāvitā ;Chaḷabhiññā sacchikatā , kataṃ buddhassa sāsanaṃ .
234.
‘‘ Sattisūlūpamā kāmā , khandhāsaṃ adhikuṭṭanā ;
Yaṃ tvaṃ ‘ kāmaratiṃ ’ brūsi ,‘ aratī ’ dāni sā mama .
235.
‘‘ Sabbattha
V0.331 vihatā nandī , tamokhandho padālito ;Evaṃ jānāhi pāpima , nihato tvamasi antakā ’’ ti .
… Uppalavaṇṇā therī ….
Dvādasanipāto niṭṭhito .