3. Tikanipāto
1. Aparāsāmātherīgāthā
39.
‘‘ Paṇṇavīsativassāni
M0.384 , yato pabbajitāya me ;Nābhijānāmi cittassa , samaṃ laddhaṃ kudācanaṃ .
40.
‘‘ Aladdhā cetaso santiṃ , citte avasavattinī ;
Tato saṃvegamāpādiṃ , saritvā jinasāsanaṃ .
41.
‘‘ Bahūhi dukkhadhammehi , appamādaratāya me ;
Taṇhakkhayo anuppatto , kataṃ buddhassa sāsanaṃ ;
Ajja
P0.128 me sattamī ratti , yato taṇhā visositā ’’ ti .… Aparā sāmā therī ….
2. Uttamātherīgāthā
42.
‘‘ Catukkhattuṃ
T0.449 pañcakkhattuṃ , vihārā upanikkhamiṃ ;Aladdhā cetaso santiṃ , citte avasavattinī .
43.
‘‘ Sā
V0.311 bhikkhuniṃ upagacchiṃ , yā me saddhāyikā ahu ;Sā me dhammamadesesi , khandhāyatanadhātuyo .
44.
‘‘ Tassā dhammaṃ suṇitvāna , yathā maṃ anusāsi sā ;
Sattāhaṃ ekapallaṅkena , nisīdiṃ pītisukhasamappitā [ nisīdiṃ sukhasamappitā ( sī .)];
Aṭṭhamiyā pāde pasāresiṃ , tamokhandhaṃ padāliyā ’’ ti .
… Uttamā therī ….
3. Aparāuttamātherīgāthā
45.
‘‘ Ye ime satta bojjhaṅgā , maggā nibbānapattiyā ;
Bhāvitā te mayā sabbe , yathā buddhena desitā .
46.
‘‘ Suññatassānimittassa , lābhinīhaṃ yadicchakaṃ ;
Orasā dhītā buddhassa , nibbānābhiratā sadā .
47.
‘‘ Sabbe
M0.385 kāmā samucchinnā , ye dibbā ye ca mānusā ;Vikkhīṇo jātisaṃsāro , natthi dāni punabbhavo ’’ ti .
… Aparā uttamā therī ….
4. Dantikātherīgāthā
48.
‘‘ Divāvihārā nikkhamma , gijjhakūṭamhi pabbate ;
Nāgaṃ ogāhamuttiṇṇaṃ , nadītīramhi addasaṃ .
49.
‘‘ Puriso aṅkusamādāya ,‘ dehi pādan ’ ti yācati ;
Nāgo pasārayī pādaṃ , puriso nāgamāruhi .
50.
‘‘ Disvā
T0.450 adantaṃ damitaṃ , manussānaṃ vasaṃ gataṃ ;Tato cittaṃ samādhesiṃ , khalu tāya vanaṃ gatā ’’ ti .
… Dantikā therī ….
5. Ubbiritherīgāthā
51.
‘‘ Amma jīvāti vanamhi kandasi , attānaṃ adhigaccha ubbiri ;
Cullāsītisahassāni [ cūḷāsītisahassāni ( sī .)], sabbā jīvasanāmikā ;
Etamhāḷāhane daḍḍhā , tāsaṃ kamanusocasi .
52.
‘‘ Abbahī
V0.312P0.129 [ abbutī ( syā .), abbuḷhaṃ ( ka .)] vata me sallaṃ , duddasaṃ hadayassitaṃ [ hadayanissitaṃ ( sī . syā .)];Yaṃ me sokaparetāya , dhītusokaṃ byapānudi .
53.
‘‘ Sājja abbūḷhasallāhaṃ , nicchātā parinibbutā ;
Buddhaṃ dhammañca saṅghañca , upemi saraṇaṃ munin ’’ ti .
… Ubbirī therī ….
6. Sukkātherīgāthā
54.
‘‘ Kiṃme katā rājagahe manussā , madhuṃ pītāva [ madhupītāva ( sī .)] acchare ;
Ye sukkaṃ na upāsanti , desentiṃ buddhasāsanaṃ .
55.
‘‘ Tañca appaṭivānīyaṃ , asecanakamojavaṃ ;
Pivanti maññe sappaññā , valāhakamivaddhagū .
56.
‘‘ Sukkā
M0.386 sukkehi dhammehi , vītarāgā samāhitā ;Dhāreti antimaṃ dehaṃ , jetvā māraṃ savāhanan ’’ ti .
… Sukkā therī ….
7. Selātherīgāthā
57.
‘‘ Natthi nissaraṇaṃ loke , kiṃ vivekena kāhasi ;
Bhuñjāhi
T0.451 kāmaratiyo , māhu pacchānutāpinī ’’. 58.
‘‘ Sattisūlūpamā kāmā , khandhāsaṃ adhikuṭṭanā ;
Yaṃ tvaṃ ‘ kāmaratiṃ ’ brūsi ,‘ aratī ’ dāni sā mama .
59.
‘‘ Sabbattha vihatā nandī [ nandi ( sī . syā .)], tamokhandho padālito ;
Evaṃ jānāhi pāpima , nihato tvamasi antakā ’’ ti .
… Selā therī ….
8. Somātherīgāthā
60.
‘‘ Yaṃ taṃ isīhi pattabbaṃ , ṭhānaṃ durabhisambhavaṃ ;
Na taṃ dvaṅgulapaññāya , sakkā pappotumitthiyā ’’.
61.
‘‘ Itthibhāvo no kiṃ kayirā , cittamhi susamāhite ;
Ñāṇamhi vattamānamhi , sammā dhammaṃ vipassato .
62.
‘‘ Sabbattha
V0.313P0.130 vihatā nandī , tamokhandho padālito ;Evaṃ jānāhi pāpima , nihato tvamasi antakā ’’ ti .
… Somā therī ….
Tikanipāto niṭṭhito .