5. Pañcakanipāto

1. Aññatarātherīgāthā

67.

‘‘ PaṇṇavīsativassāniM0.388V0.314 , yato pabbajitā ahaṃ ;

Nāccharāsaṅghātamattampi , cittassūpasamajjhagaṃ .

68.

‘‘ Aladdhā cetaso santiṃ , kāmarāgenavassutā ;

Bāhā paggayha kandantī , vihāraṃ pāvisiṃ ahaṃ .

69.

‘‘ Sā bhikkhuniṃ upāgacchiṃ , yā me saddhāyikā ahu ;

Sā me dhammamadesesi , khandhāyatanadhātuyo .

70.

‘‘ Tassā dhammaṃ suṇitvāna , ekamante upāvisiṃ ;

Pubbenivāsaṃ jānāmi , dibbacakkhu visodhitaṃ .

71.

‘‘ CetopariccañāṇañcaT0.453P0.131 [ cetopariyañāṇañca ( ka .)], sotadhātu visodhitā ;

Iddhīpi me sacchikatā , patto me āsavakkhayo ;

Chaḷabhiññā [ cha mebhiññā ( syā . ka .)] sacchikatā , kataṃ buddhassa sāsanan ’’ ti .

… Aññatarā therī ….

2. Vimalātherīgāthā

72.

‘‘ Mattā vaṇṇena rūpena , sobhaggena yasena ca ;

Yobbanena cupatthaddhā , aññāsamatimaññihaṃ .

73.

‘‘ Vibhūsetvā imaṃ kāyaṃ , sucittaṃ bālalāpanaṃ ;

Aṭṭhāsiṃ vesidvāramhi , luddo pāsamivoḍḍiya .

74.

‘‘ Pilandhanaṃ vidaṃsentī , guyhaṃ pakāsikaṃ bahuṃ ;

Akāsiṃ vividhaṃ māyaṃ , ujjagghantī bahuṃ janaṃ .

75.

‘‘ Sājja piṇḍaṃ caritvāna , muṇḍā saṅghāṭipārutā ;

Nisinnā rukkhamūlamhi , avitakkassa lābhinī .

76.

‘‘ Sabbe yogā samucchinnā , ye dibbā ye ca mānusā ;

Khepetvā āsave sabbe , sītibhūtāmhi nibbutā ’’ ti .

… Vimalā purāṇagaṇikā therī ….

3. Sīhātherīgāthā

77.

‘‘ AyonisoM0.389V0.315 manasikārā , kāmarāgena aṭṭitā ;

Ahosiṃ uddhatā pubbe , citte avasavattinī .

78.

‘‘ Pariyuṭṭhitā klesehi , subhasaññānuvattinī ;

Samaṃ cittassa na labhiṃ , rāgacittavasānugā .

79.

‘‘ KisāT0.454 paṇḍu vivaṇṇā ca , satta vassāni cārihaṃ ;

Nāhaṃ divā vā rattiṃ vā , sukhaṃ vindiṃ sudukkhitā .

80.

‘‘ Tato rajjuṃ gahetvāna , pāvisiṃ vanamantaraṃ ;

Varaṃ me idha ubbandhaṃ , yañca hīnaṃ punācare .

81.

‘‘ Daḷhapāsaṃ [ daḷhaṃ pāsaṃ ( sī .)] karitvāna , rukkhasākhāya bandhiya ;

PakkhipiṃP0.132 pāsaṃ gīvāyaṃ , atha cittaṃ vimucci me ’’ ti .

… Sīhā therī ….

4. Sundarīnandātherīgāthā

82.

‘‘ Āturaṃ asuciṃ pūtiṃ , passa nande samussayaṃ ;

Asubhāya cittaṃ bhāvehi , ekaggaṃ susamāhitaṃ .

83.

‘‘ Yathā idaṃ tathā etaṃ , yathā etaṃ tathā idaṃ ;

Duggandhaṃ pūtikaṃ vāti , bālānaṃ abhinanditaṃ .

84.

‘‘ Evametaṃ avekkhantī , rattindivamatanditā ;

Tato sakāya paññāya , abhinibbijjha [ abhinibbijja ( sī . syā .)] dakkhisaṃ .

85.

‘‘ Tassā me appamattāya , vicinantiyā yoniso ;

Yathābhūtaṃ ayaṃ kāyo , diṭṭho santarabāhiro .

86.

‘‘ Atha nibbindahaṃ kāye , ajjhattañca virajjahaṃ ;

Appamattā visaṃyuttā , upasantāmhi nibbutā ’’ ti .

… Sundarīnandā therī ….

5. Nanduttarātherīgāthā

87.

‘‘ AggiṃV0.316 candañca sūriyañca , devatā ca namassihaṃ ;

Nadītitthāni gantvāna , udakaṃ oruhāmihaṃ .

88.

‘‘ BahūvatasamādānāM0.390T0.455 , aḍḍhaṃ sīsassa olikhiṃ ;

Chamāya seyyaṃ kappemi , rattiṃ bhattaṃ na bhuñjahaṃ .

89.

‘‘ Vibhūsāmaṇḍanaratā , nhāpanucchādanehi ca ;

Upakāsiṃ imaṃ kāyaṃ , kāmarāgena aṭṭitā .

90.

‘‘ Tato saddhaṃ labhitvāna , pabbajiṃ anagāriyaṃ ;

Disvā kāyaṃ yathābhūtaṃ , kāmarāgo samūhato .

91.

‘‘ Sabbe bhavā samucchinnā , icchā ca patthanāpi ca ;

Sabbayogavisaṃyuttā , santiṃ pāpuṇi cetaso ’’ ti .

… Nanduttarā therī ….

6. Mittākāḷītherīgāthā

92.

‘‘ Saddhāya pabbajitvāna , agārasmānagāriyaṃ ;

Vicariṃhaṃ tena tena , lābhasakkāraussukā .

93.

‘‘ RiñcitvāP0.133 paramaṃ atthaṃ , hīnamatthaṃ asevihaṃ ;

Kilesānaṃ vasaṃ gantvā , sāmaññatthaṃ na bujjhihaṃ .

94.

‘‘ Tassā me ahu saṃvego , nisinnāya vihārake ;

Ummaggapaṭipannāmhi , taṇhāya vasamāgatā .

95.

‘‘ Appakaṃ jīvitaṃ mayhaṃ , jarā byādhi ca maddati ;

Purāyaṃ bhijjati [ jarāya bhijjate ( sī .)] kāyo , na me kālo pamajjituṃ .

96.

‘‘ Yathābhūtamavekkhantī , khandhānaṃ udayabbayaṃ ;

Vimuttacittā uṭṭhāsiṃ , kataṃ buddhassa sāsana ’’ ntntti .

… Mittā kāḷī therī ….

7. Sakulātherīgāthā

97.

‘‘ AgārasmiṃT0.456V0.317 vasantīhaṃ , dhammaṃ sutvāna bhikkhuno ;

Addasaṃ virajaṃ dhammaṃ , nibbānaṃ padamaccutaṃ .

98.

‘‘ Sāhaṃ puttaṃ dhītarañca , dhanadhaññañca chaḍḍiya ;

Kese chedāpayitvāna , pabbajiṃ anagāriyaṃ .

99.

‘‘ SikkhamānāM0.391 ahaṃ santī , bhāventī maggamañjasaṃ ;

Pahāsiṃ rāgadosañca , tadekaṭṭhe ca āsave .

100.

‘‘ Bhikkhunī upasampajja , pubbajātimanussariṃ ;

Dibbacakkhu visodhitaṃ [ visodhitaṃ dibbacakkhu ( sī .)], vimalaṃ sādhubhāvitaṃ .

101.

‘‘ Saṅkhāre parato disvā , hetujāte palokite [ palokine ( ka .)];

Pahāsiṃ āsave sabbe , sītibhūtāmhi nibbutā ’’ ti .

… Sakulā therī ….

8. Soṇātherīgāthā

102.

‘‘ Dasa putte vijāyitvā , asmiṃ rūpasamussaye ;

Tatohaṃ dubbalā jiṇṇā , bhikkhuniṃ upasaṅkamiṃ .

103.

‘‘ Sā me dhammamadesesi , khandhāyatanadhātuyo ;

Tassā dhammaṃ suṇitvāna , kese chetvāna pabbajiṃ .

104.

‘‘ Tassā me sikkhamānāya , dibbacakkhu visodhitaṃ ;

Pubbenivāsaṃ jānāmi , yattha me vusitaṃ pure .

105.

‘‘ AnimittañcaP0.134 bhāvemi , ekaggā susamāhitā ;

Anantarāvimokkhāsiṃ , anupādāya nibbutā .

106.

‘‘ Pañcakkhandhā pariññātā , tiṭṭhanti chinnamūlakā ;

DhiT0.457 tavatthu jare jamme , natthi dāni punabbhavo ’’ ti .

… Soṇā therī ….

9. Bhaddākuṇḍalakesātherīgāthā

107.

‘‘ LūnakesīV0.318 paṅkadharī , ekasāṭī pure cariṃ ;

Avajje vajjamatinī , vajje cāvajjadassinī .

108.

‘‘ Divāvihārā nikkhamma , gijjhakūṭamhi pabbate ;

Addasaṃ virajaṃ buddhaṃ , bhikkhusaṅghapurakkhataṃ .

109.

‘‘ Nihacca jāṇuṃ vanditvā , sammukhā añjaliṃ akaṃ ;

‘ Ehi bhadde ’ ti maṃ avaca , sā me āsūpasampadā .

110.

‘‘ CiṇṇāM0.392 aṅgā ca magadhā , vajjī kāsī ca kosalā ;

Anaṇā paṇṇāsavassāni , raṭṭhapiṇḍaṃ abhuñjahaṃ .

111.

‘‘ Puññaṃ vata pasavi bahuṃ , sappañño vatāyaṃ upāsako ;

Yo bhaddāya cīvaraṃ adāsi , vippamuttāya sabbaganthehī ’’ ti .

… Bhaddā kuṇḍalakesā therī ….

10. Paṭācārātherīgāthā

112.

‘‘ Naṅgalehi kasaṃ khettaṃ , bījāni pavapaṃ chamā ;

Puttadārāni posentā , dhanaṃ vindanti māṇavā .

113.

‘‘ Kimahaṃ sīlasampannā , satthusāsanakārikā ;

Nibbānaṃ nādhigacchāmi , akusītā anuddhatā .

114.

‘‘ Pāde pakkhālayitvāna , udakesu karomahaṃ ;

PādodakañcaT0.458 disvāna , thalato ninnamāgataṃ .

115.

‘‘ Tato cittaṃ samādhesiṃ , assaṃ bhadraṃvajāniyaṃ ;

TatoP0.135 dīpaṃ gahetvāna , vihāraṃ pāvisiṃ ahaṃ ;

Seyyaṃ olokayitvāna , mañcakamhi upāvisiṃ .

116.

‘‘ Tato sūciṃ gahetvāna , vaṭṭiṃ okassayāmahaṃ ;

Padīpasseva nibbānaṃ , vimokkho ahu cetaso ’’ ti .

… Paṭācārā therī ….

11. Tiṃsamattātherīgāthā

117.

‘‘‘ MusalāniV0.319 gahetvāna , dhaññaṃ koṭṭenti māṇavā [ mānavā ( sī .)];

Puttadārāni posentā , dhanaṃ vindanti māṇavā .

118.

‘‘‘ Karotha buddhasāsanaṃ , yaṃ katvā nānutappati ;

Khippaṃ pādāni dhovitvā , ekamante nisīdatha ;

Cetosamathamanuyuttā , karotha buddhasāsanaṃ ’.

119.

‘‘ Tassā tā [ taṃ ( sī .)] vacanaṃ sutvā , paṭācārāya sāsanaṃ ;

Pāde pakkhālayitvāna , ekamantaṃ upāvisuṃ ;

Cetosamathamanuyuttā , akaṃsu buddhasāsanaṃ .

120.

‘‘ RattiyāM0.393 purime yāme , pubbajātimanussaruṃ ;

Rattiyā majjhime yāme , dibbacakkhuṃ visodhayuṃ ;

Rattiyā pacchime yāme , tamokhandhaṃ padālayuṃ .

121.

‘‘ Uṭṭhāya pāde vandiṃsu ,‘ katā te anusāsanī ;

IndaṃvaT0.459 devā tidasā , saṅgāme aparājitaṃ ;

Purakkhatvā vihassāma [ viharāma ( sī .), viharissāma ( syā .)], tevijjāmha anāsavā ’’’ ti .

Itthaṃ sudaṃ tiṃsamattā therī bhikkhuniyo paṭācārāya santike aññaṃ byākariṃsūti .

12. Candātherīgāthā

122.

‘‘ Duggatāhaṃ pure āsiṃ , vidhavā ca aputtikā ;

Vinā mittehi ñātīhi , bhattacoḷassa nādhigaṃ .

123.

‘‘ Pattaṃ daṇḍañca gaṇhitvā , bhikkhamānā kulā kulaṃ ;

Sītuṇhena ca ḍayhantī , satta vassāni cārihaṃ .

124.

‘‘ Bhikkhuniṃ puna disvāna , annapānassa lābhiniṃ ;

Upasaṅkamma avocaṃ [ avociṃ ( ka .)],‘ pabbajjaṃ anagāriyaṃ ’.

125.

‘‘ SāP0.136 ca maṃ anukampāya , pabbājesi paṭācārā ;

Tato maṃ ovaditvāna , paramatthe niyojayi .

126.

‘‘ TassāhaṃV0.320 vacanaṃ sutvā , akāsiṃ anusāsaniṃ ;

Amogho ayyāyovādo , tevijjāmhi anāsavā ’’ ti .

… Candā therī ….

Pañcakanipāto niṭṭhito .

问题

选择版本

Therīgāthāpāḷi

Therīgāthāpāḷi