6. Chakkanipāto
1. Pañcasatamattātherīgāthā
127.
‘‘ Yassa
M0.394 maggaṃ na jānāsi , āgatassa gatassa vā ;Taṃ
T0.460 kuto cāgataṃ sattaṃ [ santaṃ ( sī .), puttaṃ ( syā .)],‘ mama putto ’ ti rodasi . 128.
‘‘ Maggañca khossa [ kho ’ tha ( syā . ka .)] jānāsi , āgatassa gatassa vā ;
Na naṃ samanusocesi , evaṃdhammā hi pāṇino .
129.
‘‘ Ayācito tatāgacchi , nānuññāto [ ananuññāto ( sī . syā .)] ito gato ;
Kutoci nūna āgantvā , vasitvā katipāhakaṃ ;
Itopi aññena gato , tatopaññena gacchati .
130.
‘‘ Peto manussarūpena , saṃsaranto gamissati ;
Yathāgato tathā gato , kā tattha paridevanā ’’.
131.
‘‘ Abbahī [ abbuyhaṃ ( syā .)] vata me sallaṃ , duddasaṃ hadayassitaṃ ;
Yā me sokaparetāya , puttasokaṃ byapānudi .
132.
‘‘ Sājja abbūḷhasallāhaṃ , nicchātā parinibbutā ;
Buddhaṃ dhammañca saṅghañca , upemi saraṇaṃ muniṃ ’’.
Itthaṃ sudaṃ pañcasatamattā therī bhikkhuniyo … pe ….
2. Vāseṭṭhītherīgāthā
133.
‘‘ Puttasokenahaṃ aṭṭā , khittacittā visaññinī ;
Naggā pakiṇṇakesī ca , tena tena vicārihaṃ .
134.
‘‘ Vīthi [ vasiṃ ( sī .)] saṅkārakūṭesu , susāne rathiyāsu ca ;
Acariṃ tīṇi vassāni , khuppipāsāsamappitā .
135.
‘‘ Athaddasāsiṃ
V0.321P0.137 sugataṃ , nagaraṃ mithilaṃ pati [ gataṃ ( ka .)];Adantānaṃ dametāraṃ , sambuddhamakutobhayaṃ .
136.
‘‘ Sacittaṃ
T0.461 paṭiladdhāna , vanditvāna upāvisiṃ ;So me dhammamadesesi , anukampāya gotamo .
137.
‘‘ Tassa
M0.395 dhammaṃ suṇitvāna , pabbajiṃ anagāriyaṃ ;Yuñjantī satthuvacane , sacchākāsiṃ padaṃ sivaṃ .
138.
‘‘ Sabbe sokā samucchinnā , pahīnā etadantikā ;
Pariññātā hi me vatthū , yato sokāna sambhavo ’’ ti .
… Vāseṭṭhī therī ….
3. Khemātherīgāthā
139.
‘‘ Daharā tvaṃ rūpavatī , ahampi daharo yuvā ;
Pañcaṅgikena turiyena [ tūrena ( ka .)], ehi kheme ramāmase ’’.
140.
‘‘ Iminā pūtikāyena , āturena pabhaṅgunā ;
Aṭṭiyāmi harāyāmi , kāmataṇhā samūhatā .
141.
‘‘ Sattisūlūpamā kāmā , khandhāsaṃ adhikuṭṭanā ;
Yaṃ ‘ tvaṃ kāmaratiṃ ’ brūsi ,‘ aratī ’ dāni sā mama .
142.
‘‘ Sabbattha vihatā nandī , tamokhandho padālito ;
Evaṃ jānāhi pāpima , nihato tvamasi antaka .
143.
‘‘ Nakkhattāni namassantā , aggiṃ paricaraṃ vane ;
Yathābhuccamajānantā , bālā suddhimamaññatha .
144.
‘‘ Ahañca kho namassantī , sambuddhaṃ purisuttamaṃ ;
Pamuttā [ parimuttā ( sī . syā .)] sabbadukkhehi , satthusāsanakārikā ’’ ti .
… Khemā therī ….
4. Sujātātherīgāthā
145.
‘‘ Alaṅkatā
T0.462 suvasanā , mālinī candanokkhitā ;Sabbābharaṇasañchannā , dāsīgaṇapurakkhatā .
146.
‘‘ Annaṃ
V0.322 pānañca ādāya , khajjaṃ bhojjaṃ anappakaṃ ;Gehato nikkhamitvāna , uyyānamabhihārayiṃ .
147.
‘‘ Tattha
P0.138 ramitvā kīḷitvā , āgacchantī sakaṃ gharaṃ ;Vihāraṃ daṭṭhuṃ pāvisiṃ , sākete añjanaṃ vanaṃ .
148.
‘‘ Disvāna
M0.396 lokapajjotaṃ , vanditvāna upāvisiṃ ;So me dhammamadesesi , anukampāya cakkhumā .
149.
‘‘ Sutvā ca kho mahesissa , saccaṃ sampaṭivijjhahaṃ ;
Tattheva virajaṃ dhammaṃ , phusayiṃ amataṃ padaṃ .
150.
‘‘ Tato viññātasaddhammā , pabbajiṃ anagāriyaṃ ;
Tisso vijjā anuppattā , amoghaṃ buddhasāsanan ’’ ti .
… Sujātā therī ….
5. Anopamātherīgāthā
151.
‘‘ Ucce kule ahaṃ jātā , bahuvitte mahaddhane ;
Vaṇṇarūpena sampannā , dhītā majjhassa [ meghassa ( sī .), meghissa ( syā .)] atrajā .
152.
‘‘ Patthitā rājaputtehi , seṭṭhiputtehi gijjhitā [ seṭṭhiputtehi bhijjhitā ( sī .)];
Pitu me pesayī dūtaṃ , detha mayhaṃ anopamaṃ .
153.
‘‘ Yattakaṃ tulitā esā , tuyhaṃ dhītā anopamā ;
Tato aṭṭhaguṇaṃ dassaṃ , hiraññaṃ ratanāni ca .
154.
‘‘ Sāhaṃ
T0.463 disvāna sambuddhaṃ , lokajeṭṭhaṃ anuttaraṃ ;Tassa pādāni vanditvā , ekamantaṃ upāvisiṃ .
155.
‘‘ So me dhammamadesesi , anukampāya gotamo ;
Nisinnā āsane tasmiṃ , phusayiṃ tatiyaṃ phalaṃ .
156.
‘‘ Tato kesāni chetvāna , pabbajiṃ anagāriyaṃ ;
Ajja me sattamī ratti , yato taṇhā visositā ’’ ti .
… Anopamā therī ….
6. Mahāpajāpatigotamītherīgāthā
157.
‘‘ Buddha
V0.323 vīra namo tyatthu , sabbasattānamuttama ;Yo maṃ dukkhā pamocesi , aññañca bahukaṃ janaṃ .
158.
‘‘ Sabbadukkhaṃ pariññātaṃ , hetutaṇhā visositā ;
Bhāvito aṭṭhaṅgiko [ ariyaṭṭhaṅgiko ( sī . ka .), bhāvitaṭṭhaṅgiko ( syā .)] maggo , nirodho phusito mayā .
159.
‘‘ Mātā
M0.397P0.139 putto pitā bhātā , ayyakā ca pure ahuṃ ;Yathābhuccamajānantī , saṃsariṃhaṃ anibbisaṃ .
160.
‘‘ Diṭṭho hi me so bhagavā , antimoyaṃ samussayo ;
Vikkhīṇo jātisaṃsāro , natthi dāni punabbhavo .
161.
‘‘ Āraddhavīriye pahitatte , niccaṃ daḷhaparakkame ;
Samagge sāvake passe , esā buddhāna vandanā .
162.
‘‘ Bahūnaṃ [ bahunnaṃ ( sī . syā .)] vata atthāya , māyā janayi gotamaṃ ;
Byādhimaraṇatunnānaṃ , dukkhakkhandhaṃ byapānudī ’’ ti .
… Mahāpajāpatigotamī therī ….
7. Guttātherīgāthā
163.
‘‘ Gutte
T0.464 yadatthaṃ pabbajjā , hitvā puttaṃ vasuṃ piyaṃ ;Tameva anubrūhehi , mā cittassa vasaṃ gami .
164.
‘‘ Cittena vañcitā sattā , mārassa visaye ratā ;
Anekajātisaṃsāraṃ , sandhāvanti aviddasū .
165.
‘‘ Kāmacchandañca byāpādaṃ , sakkāyadiṭṭhimeva ca ;
Sīlabbataparāmāsaṃ , vicikicchañca pañcamaṃ .
166.
‘‘ Saṃyojanāni etāni , pajahitvāna bhikkhunī ;
Orambhāgamanīyāni , nayidaṃ punarehisi .
167.
‘‘ Rāgaṃ mānaṃ avijjañca , uddhaccañca vivajjiya ;
Saṃyojanāni chetvāna , dukkhassantaṃ karissasi .
168.
‘‘ Khepetvā
V0.324 jātisaṃsāraṃ , pariññāya punabbhavaṃ ;Diṭṭheva dhamme nicchātā , upasantā carissatī ’’ ti .
… Guttā therī ….
8. Vijayātherīgāthā
169.
‘‘ Catukkhattuṃ pañcakkhattuṃ , vihārā upanikkhamiṃ ;
Aladdhā cetaso santiṃ , citte avasavattinī .
170.
‘‘ Bhikkhuniṃ
M0.398 upasaṅkamma , sakkaccaṃ paripucchahaṃ ;Sā me dhammamadesesi , dhātuāyatanāni ca .
171.
‘‘ Cattāri
P0.140 ariyasaccāni , indriyāni balāni ca ;Bojjhaṅgaṭṭhaṅgikaṃ maggaṃ , uttamatthassa pattiyā .
172.
‘‘ Tassāhaṃ
T0.465 vacanaṃ sutvā , karontī anusāsaniṃ ;Rattiyā purime yāme , pubbajātimanussariṃ .
173.
‘‘ Rattiyā majjhime yāme , dibbacakkhuṃ visodhayiṃ ;
Rattiyā pacchime yāme , tamokhandhaṃ padālayiṃ .
174.
‘‘ Pītisukhena ca kāyaṃ , pharitvā vihariṃ tadā ;
Sattamiyā pāde pasāresiṃ , tamokhandhaṃ padāliyā ’’ ti .
… Vijayā therī ….
Chakkanipāto niṭṭhito .