Therīapadānapāḷi

1. Sumedhāvaggo

1. Sumedhātherīapadānaṃ

Atha therikāpadānāni suṇātha –

‘‘ BhagavatiT2.254M2.187V2.179P2.512 koṇāgamane , saṅghārāmamhi navanivesanamhi [ nivesamhi ( syā .)];

Sakhiyo tisso janiyo , vihāradānaṃ adāsimha .

‘‘ Dasakkhattuṃ satakkhattuṃ , dasasatakkhattuṃ satānañca satakkhattuṃ [ satāni ca sattakkhattuṃ ( sī . ka .)];

Devesu upapajjimha , ko vādo mānuse bhave .

‘‘ DeveV2.180 mahiddhikā ahumha , mānusakamhi ko vādo ;

Sattaratanamahesī [ sattaratanassa mahesī ( sī . pī .)], itthiratanaṃ ahaṃ bhaviṃ .

‘‘ Idha sañcitakusalā [ tattha sañcitaṃ kusalaṃ ( syā .)], susamiddhakulappajā ;

Dhanañjānī ca khemā ca , ahampi ca tayo janā .

‘‘ Ārāmaṃ sukataṃ katvā , sabbāvayavamaṇḍitaṃ ;

Buddhappamukhasaṅghassa , niyyādetvā samoditā .

‘‘ YatthaM2.188 yatthūpapajjāmi , tassa kammassa vāhasā ;

Devesu aggataṃ pattā , manussesu tatheva ca .

‘‘ Imasmiṃyeva kappamhi , brahmabandhu mahāyaso ;

Kassapo nāma gottena , uppajji vadataṃ varo .

‘‘ UpaṭṭhākoT2.255 mahesissa , tadā āsi narissaro ;

Kāsirājā kikī nāma , bārāṇasipuruttame .

‘‘ Tassāsuṃ satta dhītaro , rājakaññā sukhedhitā [ sukhethitā ( syā .)];

Buddhopaṭṭhānaniratā , brahmacariyaṃ cariṃsu tā .

10.

‘‘ Tāsaṃ sahāyikā hutvā , sīlesu susamāhitā ;

Datvā dānāni sakkaccaṃ , agāreva vataṃ [ agāreva vattaṃ ( syā .)] cariṃ .

11.

‘‘ Tena kammena sukatena , cetanāpaṇidhīhi ca ;

Jahitvā mānusaṃ dehaṃ , tāvatiṃsūpagā ahaṃ .

12.

‘‘ Tato cutā yāmamagaṃ [ yāmasaggaṃ ( syā .)], tatohaṃ tusitaṃ gatā ;

Tato ca nimmānaratiṃ , vasavattipuraṃ tato .

13.

‘‘ Yattha yatthūpapajjāmi , puññakammasamohitā ;

Tattha tattheva rājūnaṃ , mahesittamakārayiṃ .

14.

‘‘ TatoP2.513 cutā manussatte , rājūnaṃ cakkavattinaṃ ;

Maṇḍalīnañca rājūnaṃ , mahesittamakārayiṃ .

15.

‘‘ Sampattimanubhotvāna , devesu mānusesu ca ;

Sabbattha sukhitā hutvā , nekajātīsu saṃsariṃ .

16.

‘‘ So hetu ca so pabhavo , tammūlaṃ sāsane khamaṃ [ tammūlaṃ sā ca sāsane khanti ( sī . pī . ka .)];

Paṭhamaṃ taṃ samodhānaṃ , taṃ dhammaratāya nibbānaṃ [ nibbutaṃ ( syā .)].

17.

‘‘ KilesāV2.181 jhāpitā mayhaṃ , bhavā sabbe samūhatā ;

Nāgīva bandhanaṃ chetvā , viharāmi anāsavā .

18.

‘‘ SvāgataṃT2.256 vata me āsi , mama buddhassa [ buddhaseṭṭhassa ( sī . syā . ka .)] santike ;

Tisso vijjā anuppattā , kataṃ buddhassa sāsanaṃ .

19.

‘‘ PaṭisambhidāM2.189 catasso , vimokkhāpi ca aṭṭhime ;

Chaḷabhiññā sacchikatā , kataṃ buddhassa sāsanaṃ ’’.

Itthaṃ sudaṃ sumedhā bhikkhunī imā gāthāyo abhāsitthāti .

Sumedhātheriyāpadānaṃ paṭhamaṃ .

2. Mekhalādāyikātherīapadānaṃ

20.

‘‘ Siddhatthassa bhagavato , thūpakārāpikā ahuṃ [ thūpakāra makāsahaṃ ( syā .)];

Mekhalikā mayā dinnā , navakammāya satthuno .

21.

‘‘ Niṭṭhite ca mahāthūpe , mekhalaṃ punadāsahaṃ ;

Lokanāthassa munino , pasannā sehi pāṇibhi .

22.

‘‘ Catunnavutito kappe , yaṃ mekhalamadaṃ tadā ;

Duggatiṃ nābhijānāmi , thūpakārassidaṃ phalaṃ .

23.

‘‘ Kilesā jhāpitā mayhaṃ … pe … viharāmi anāsavā .

24.

‘‘ SvāgataṃP2.514 vata me āsi … pe … kataṃ buddhassa sāsanaṃ .

25.

‘‘ Paṭisambhidā catasso … pe … kataṃ buddhassa sāsanaṃ ’’.

ItthaṃT2.257 sudaṃ mekhalādāyikā bhikkhunī imā gāthāyo abhāsitthāti .

Mekhalādāyikātheriyāpadānaṃ dutiyaṃ .

3. Maṇḍapadāyikātherīapadānaṃ

26.

‘‘ KoṇāgamanabuddhassaV2.182 , maṇḍapo kārito mayā ;

Dhuvaṃ ticīvaraṃdāsiṃ [ thūpañca pavaramadaṃ ( syā .), dhuvañca cīvaraṃ adaṃ ( pī .)], buddhassa lokabandhuno .

27.

‘‘ Yaṃ yaṃ janapadaṃ yāmi , nigame rājadhāniyo ;

Sabbattha pūjito homi , puññakammassidaṃ phalaṃ .

28.

‘‘ Kilesā jhāpitā mayhaṃ … pe … viharāmi anāsavā .

29.

‘‘ SvāgataṃM2.190 vata me āsi … pe … kataṃ buddhassa sāsanaṃ .

30.

‘‘ Paṭisambhidā catasso … pe … kataṃ buddhassa sāsanaṃ ’’.

Itthaṃ sudaṃ maṇḍapadāyikā bhikkhunī imā gāthāyo abhāsitthāti .

Maṇḍapadāyikātheriyāpadānaṃ tatiyaṃ .

4. Saṅkamanatthātherīapadānaṃ

31.

‘‘ Vipassissa bhagavato [ koṇḍaññassa bhagavato ( syā . pī .)], lokajeṭṭhassa tādino ;

Rathiyaṃ paṭipannassa , tārayantassa pāṇino .

32.

‘‘ GharatoT2.258 nikkhamitvāna , avakujjā nipajjahaṃ ;

Anukampako lokanātho , sirasi [ sīsante ( sī . ka .)] akkamī mama [ tadā ( syā . pī .)].

33.

‘‘ Akkamitvāna sirasi [ sambuddho ( ka .)], agamā lokanāyako ;

Tena cittappasādena , tusitaṃ agamāsahaṃ .

34.

‘‘ Kilesā jhāpitā mayhaṃ … pe … viharāmi anāsavā .

35.

‘‘ SvāgataṃP2.515 vata me āsi … pe … kataṃ buddhassa sāsanaṃ .

36.

‘‘ Paṭisambhidā catasso … pe … kataṃ buddhassa sāsanaṃ ’’.

Itthaṃ sudaṃ saṅkamanatthā [ saṅkamanadā ( syā .)] bhikkhunī imā gāthāyo abhāsitthāti .

Saṅkamanatthātheriyāpadānaṃ catutthaṃ .

5. Naḷamālikātherīapadānaṃ

37.

‘‘ CandabhāgānadītīreV2.183 , ahosiṃ kinnarī tadā ;

Addasaṃ virajaṃ buddhaṃ , sayambhuṃ aparājitaṃ .

38.

‘‘ Pasannacittā sumanā , vedajātā katañjalī ;

Naḷamālaṃ gahetvāna , sayambhuṃ abhipūjayiṃ .

39.

‘‘ TenaM2.191 kammena sukatena , cetanāpaṇidhīhi ca ;

Jahitvā kinnarīdehaṃ , agacchiṃ tidasaṃ gatiṃ .

40.

‘‘ ChattiṃsadevarājūnaṃT2.259 , mahesittamakārayiṃ ;

Dasannaṃ cakkavattīnaṃ , mahesittamakārayiṃ ;

Saṃvejetvāna me cittaṃ [ vedayitvāna kusalaṃ ( syā .), saṃvedayitvā kusalaṃ ( pī .)], pabbajiṃ anagāriyaṃ .

41.

‘‘ Kilesā jhāpitā mayhaṃ , bhavā sabbe samūhatā [ bhavā saṃghātitā mama ( ka .)];

Sabbāsavaparikkhīṇā , natthi dāni punabbhavo .

42.

‘‘ Catunnavutito kappe , yaṃ pupphamabhipūjayiṃ ;

Duggatiṃ nābhijānāmi , pupphapūjāyidaṃ phalaṃ .

43.

‘‘ Kilesā jhāpitā mayhaṃ … pe … viharāmi anāsavā .

44.

‘‘ Svāgataṃ vata me āsi … pe … kataṃ buddhassa sāsanaṃ .

45.

‘‘ Paṭisambhidā catasso … pe … kataṃ buddhassa sāsanaṃ ’’.

Itthaṃ sudaṃ naḷamālikā therī imā gāthāyo abhāsitthāti .

Naḷamālikātheriyāpadānaṃ pañcamaṃ .

6. Ekapiṇḍapātadāyikātherīapadānaṃ

46.

‘‘ Nagare bandhumatiyā , bandhumā nāma khattiyo ;

Tassa rañño ahuṃ bhariyā , ekajjhaṃ cārayāmahaṃ [ ekaccaṃ vādayāmahaṃ ( syā .)].

47.

‘‘ RahogatāT2.260V2.184 nisīditvā , evaṃ cintesahaṃ tadā ;

‘ Ādāya gamanīyañhi , kusalaṃ natthi me kataṃ .

48.

‘‘‘ MahābhitāpaṃP2.516 kaṭukaṃ , ghorarūpaṃ sudāruṇaṃ ;

Nirayaṃ nūna gacchāmi , ettha me natthi saṃsayo ’.

49.

‘‘ Rājānaṃ upasaṅkamma , idaṃ vacanamabraviṃ ;

‘ Ekaṃ me samaṇaṃ dehi , bhojayissāmi khattiya ’.

50.

‘‘ Adāsi me mahārājā , samaṇaṃ bhāvitindriyaṃ ;

Tassa pattaṃ gahetvāna , paramannena pūrayiṃ [ tappayiṃ ( sī .)].

51.

‘‘ PūrayitvāM2.192 paramannaṃ , gandhālepaṃ akāsahaṃ ;

Jālena pidahitvāna , vatthayugena [ pītacoḷena ( syā .), mahānelena ( pī .)] chādayiṃ .

52.

‘‘ Ārammaṇaṃ mamaṃ etaṃ , sarāmi yāvajīvihaṃ ;

Tattha cittaṃ pasādetvā , tāvatiṃsamagacchahaṃ .

53.

‘‘ Tiṃsānaṃ devarājūnaṃ , mahesittamakārayiṃ ;

Manasā patthitaṃ mayhaṃ , nibbattati yathicchitaṃ [ yaticchakaṃ ( syā .), yadicchakaṃ ( pī . ka .)].

54.

‘‘ Vīsānaṃ cakkavattīnaṃ , mahesittamakārayiṃ ;

Ocitattāva [ upacitattā ( syā .)] hutvāna , saṃsarāmi bhavesvahaṃ .

55.

‘‘ Sabbabandhanamuttāhaṃ , apetā me upādikā ;

Sabbāsavaparikkhīṇā , natthi dāni punabbhavo .

56.

‘‘ Ekanavutito kappe , yaṃ dānamadadiṃ tadā ;

DuggatiṃT2.261 nābhijānāmi , piṇḍapātassidaṃ phalaṃ .

57.

‘‘ Kilesā jhāpitā mayhaṃ … pe … viharāmi anāsavā .

58.

‘‘ Svāgataṃ vata me āsi … pe … kataṃ buddhassa sāsanaṃ .

59.

‘‘ Paṭisambhidā catasso … pe … kataṃ buddhassa sāsanaṃ ’’.

Itthaṃ sudaṃ ekapiṇḍapātadāyikā bhikkhunī imā gāthāyo abhāsitthāti .

Ekapiṇḍapātadāyikātheriyāpadānaṃ chaṭṭhaṃ .

7. Kaṭacchubhikkhādāyikātherīapadānaṃ

60.

‘‘ PiṇḍacāraṃV2.185 carantassa , tissanāmassa satthuno ;

Kaṭacchubhikkhaṃ paggayha , buddhaseṭṭhassa dāsahaṃ .

61.

‘‘ PaṭiggahetvāP2.517 sambuddho , tisso lokagganāyako ;

Vīthiyā saṇṭhito satthā , akā me anumodanaṃ .

62.

‘‘‘ KaṭacchubhikkhaṃM2.193 datvāna , tāvatiṃsaṃ gamissasi ;

Chattiṃsadevarājūnaṃ , mahesittaṃ karissasi .

63.

‘‘‘ Paññāsaṃ cakkavattīnaṃ , mahesittaṃ karissasi ;

Manasā patthitaṃ sabbaṃ , paṭilacchasi sabbadā .

64.

‘‘‘ SampattiṃT2.262 anubhotvāna , pabbajissasikiñcanā ;

Sabbāsave pariññāya , nibbāyissasināsavā ’.

65.

‘‘ Idaṃ vatvāna sambuddho , tisso lokagganāyako ;

Nabhaṃ abbhuggamī vīro , haṃsarājāva ambare .

66.

‘‘ Sudinnaṃ me dānavaraṃ [ sudinnameva me dānaṃ ( syā .)], suyiṭṭhā yāgasampadā ;

Kaṭacchubhikkhaṃ datvāna , pattāhaṃ acalaṃ padaṃ .

67.

‘‘ Dvenavute ito kappe , yaṃ dānamadadiṃ tadā ;

Duggatiṃ nābhijānāmi , bhikkhādānassidaṃ phalaṃ .

68.

‘‘ Kilesā jhāpitā mayhaṃ … pe … viharāmi anāsavā .

69.

‘‘ Svāgataṃ vata me āsi … pe … kataṃ buddhassa sāsanaṃ .

70.

‘‘ Paṭisambhidā catasso … pe … kataṃ buddhassa sāsanaṃ ’’.

Itthaṃ sudaṃ kaṭacchubhikkhādāyikā bhikkhunī imā gāthāyo abhāsitthāti .

Kaṭacchubhikkhādāyikātheriyāpadānaṃ sattamaṃ .

8. Sattuppalamālikātherīapadānaṃ

71.

‘‘ NagareV2.186 aruṇavatiyā , aruṇo nāma [ aruṇavā nāma ( sī . pī .)] ttiyo ;

Tassa rañño ahuṃ bhariyā , vāritaṃ vārayāmahaṃ [ cārikaṃ cārayāmahaṃ ( sī .), na gulaṃ pādayāmahaṃ ( syā .), na mālaṃ pādayāmahaṃ ( pī .)].

72.

‘‘ SattamālaṃT2.263 gahetvāna , uppalā devagandhikā ;

Nisajja pāsādavare , evaṃ cintesi tāvade .

73.

‘‘‘ KiṃM2.194 me imāhi mālāhi , sirasāropitāhi me ;

Varaṃ me buddhaseṭṭhassa , ñāṇamhi abhiropitaṃ ’.

74.

‘‘ SambuddhaṃP2.518 paṭimānentī , dvārāsanne nisīdahaṃ ;

‘ Yadā ehiti sambuddho , pūjayissaṃ mahāmuniṃ ’.

75.

‘‘ Kakudho vilasantova , migarājāva kesarī ;

Bhikkhusaṅghena sahito , āgacchi vīthiyā jino .

76.

‘‘ Buddhassa raṃsiṃ disvāna , haṭṭhā saṃviggamānasā ;

Dvāraṃ avāpuritvāna [ apāpuṇitvā ( syā .)], buddhaseṭṭhamapūjayiṃ .

77.

‘‘ Satta uppalapupphāni , parikiṇṇāni [ suvitthiṇṇāni ( syā .)] ambare ;

Chadiṃ karonto buddhassa , matthake dhārayanti te .

78.

‘‘ Udaggacittā sumanā , vedajātā katañjalī ;

Tattha cittaṃ pasādetvā , tāvatiṃsamagacchahaṃ .

79.

‘‘ Mahānelassa chādanaṃ , dhārenti mama muddhani ;

Dibbagandhaṃ pavāyāmi , sattuppalassidaṃ phalaṃ .

80.

‘‘ Kadāci nīyamānāya , ñātisaṅghena me tadā ;

Yāvatā parisā mayhaṃ , mahānelaṃ dharīyati .

81.

‘‘ Sattati devarājūnaṃ , mahesittamakārayiṃ ;

Sabbattha issarā hutvā , saṃsarāmi bhavābhave .

82.

‘‘ TesaṭṭhiT2.264 cakkavattīnaṃ , mahesittamakārayiṃ ;

Sabbe mamanuvattanti , ādeyyavacanā ahuṃ .

83.

‘‘ Uppalasseva me vaṇṇo , gandho ceva pavāyati ;

Dubbaṇṇiyaṃ na jānāmi [ duggatiṃ nābhijānāmi ( syā . pī .)], buddhapūjāyidaṃ phalaṃ .

84.

‘‘ IddhipādesuV2.187 kusalā , bojjhaṅgabhāvanā ratā ;

Abhiññāpāramippattā , buddhapūjāyidaṃ phalaṃ .

85.

‘‘ Satipaṭṭhānakusalā , samādhijhānagocarā ;

Sammappadhānamanuyuttā , buddhapūjāyidaṃ phalaṃ .

86.

‘‘ VīriyaṃM2.195 me dhuradhorayhaṃ , yogakkhemādhivāhanaṃ ;

Sabbāsavaparikkhīṇā , natthi dāni punabbhavo .

87.

‘‘ EkatiṃseP2.519 ito kappe , yaṃ pupphamabhipūjayiṃ ;

Duggatiṃ nābhijānāmi , buddhapūjāyidaṃ phalaṃ .

88.

‘‘ Kilesā jhāpitā mayhaṃ … pe … viharāmi anāsavā .

89.

‘‘ Svāgataṃ vata me āsi … pe … kataṃ buddhassa sāsanaṃ .

90.

‘‘ Paṭisambhidā catasso … pe … kataṃ buddhassa sāsanaṃ ’’.

Itthaṃ sudaṃ sattuppalamālikā bhikkhunī imā gāthāyo abhāsitthāti .

Sattuppalamālikātheriyāpadānaṃ aṭṭhamaṃ .

9. Pañcadīpikātherīapadānaṃ

91.

‘‘ NagareT2.265 haṃsavatiyā , cārikī [ cāriniṃ ( syā .)] āsahaṃ tadā ;

Ārāmena ca ārāmaṃ , carāmi kusalatthikā .

92.

‘‘ Kāḷapakkhamhi divase , addasaṃ bodhimuttamaṃ ;

Tattha cittaṃ pasādetvā , bodhimūle nisīdahaṃ .

93.

‘‘ Garucittaṃ upaṭṭhetvā , sire katvāna añjaliṃ ;

Somanassaṃ pavedetvā , evaṃ cintesi tāvade .

94.

‘‘‘ Yadi buddho amitaguṇo , asamappaṭipuggalo ;

Dassetu pāṭihīraṃ me , bodhi obhāsatu ayaṃ ’.

95.

‘‘ Saha āvajjite mayhaṃ , bodhi pajjali tāvade ;

Sabbasoṇṇamayā āsi , disā sabbā virocati .

96.

‘‘ SattarattindivaṃV2.188 [ sattarattidivaṃ ( pī . ka .)] tattha , bodhimūle nisīdahaṃ ;

Sattame divase patte , dīpapūjaṃ akāsahaṃ .

97.

‘‘ Āsanaṃ parivāretvā , pañcadīpāni pajjaluṃ ;

Yāva udeti sūriyo , dīpā me pajjaluṃ tadā .

98.

‘‘ TenaM2.196 kammena sukatena , cetanāpaṇidhīhi ca ;

Jahitvā mānusaṃ dehaṃ , tāvatiṃsamagacchahaṃ .

99.

‘‘ Tattha me sukataṃ byamhaṃ , pañcadīpāti vuccati ;

Saṭṭhiyojanamubbedhaṃ [ satayojanamubbedhaṃ ( sī . syā . pī .)], tiṃsayojanavitthataṃ [ saṭṭhi …( syā . pī .)].

100.

‘‘ AsaṅkhiyāniT2.266 dīpāni , parivāre jalanti me ;

Yāvatā devabhavanaṃ , dīpālokena jotati .

101.

‘‘ ParammukhāP2.520 nisīditvā [ puratthābhimukhā santi ( syā .), puratthābhimukhā thitā ( pī .)], yadi icchāmi passituṃ ;

Uddhaṃ adho ca tiriyaṃ , sabbaṃ passāmi cakkhunā .

102.

‘‘ Yāvatā abhikaṅkhāmi , daṭṭhuṃ sugataduggate [ sukatadukkate ( pī .];

Tattha āvaraṇaṃ natthi , rukkhesu pabbatesu vā .

103.

‘‘ Asīti devarājūnaṃ , mahesittamakārayiṃ ;

Satānaṃ cakkavattīnaṃ , mahesittamakārayiṃ .

104.

‘‘ Yaṃ yaṃ yonupapajjāmi , devattaṃ atha mānusaṃ ;

Dīpasatasahassāni , parivāre jalanti me .

105.

‘‘ Devalokā cavitvāna , uppajjiṃ mātukucchiyaṃ ;

Mātukucchigatā santī [ mātukucchigataṃ santiṃ ( sī .)], akkhi me na nimīlati .

106.

‘‘ Dīpasatasahassāni , puññakammasamaṅgitā ;

Jalanti sūtikāgehe [ sūtighare pajjalanti ( sabbattha )], pañcadīpānidaṃ phalaṃ .

107.

‘‘ Pacchime bhave sampatte , mānasaṃ vinivattayiṃ ;

Ajarāmataṃ sītibhāvaṃ , nibbānaṃ phassayiṃ ahaṃ .

108.

‘‘ Jātiyā sattavassāhaṃ , arahattamapāpuṇiṃ ;

Upasampādayī buddho , guṇamaññāya gotamo .

109.

‘‘ Maṇḍape rukkhamūle vā , pāsādesu guhāsu vā ;

SuññāgāreT2.267 vasantiyā [ ca jhāyante ( sī .), ca jhāyantā ( pī .), pajjhāyantā ( syā .)], pañcadīpā jalanti me .

110.

‘‘ DibbacakkhuM2.197V2.189 visuddhaṃ me , samādhikusalā ahaṃ ;

Abhiññāpāramippattā , pañcadīpānidaṃ phalaṃ .

111.

‘‘ Sabbavositavosānā , katakiccā anāsavā ;

Pañcadīpā mahāvīra , pāde vandāmi [ vandati ( sī . ka .)] cakkhuma .

112.

‘‘ Satasahassito kappe , yaṃ dīpamadadiṃ tadā ;

Duggatiṃ nābhijānāmi , pañcadīpānidaṃ phalaṃ .

113.

‘‘ Kilesā jhāpitā mayhaṃ … pe … viharāmi anāsavā .

114.

‘‘ SvāgataṃP2.521 vata me āsi … pe … kataṃ buddhassa sāsanaṃ .

115.

‘‘ Paṭisambhidā catasso … pe … kataṃ buddhassa sāsanaṃ ’’.

Itthaṃ sudaṃ pañcadīpikā bhikkhunī imā gāthāyo abhāsitthāti .

Pañcadīpikātheriyāpadānaṃ navamaṃ .

10. Udakadāyikātherīapadānaṃ

116.

‘‘ Nagare bandhumatiyā , ahosiṃ udahārikā ;

Udahārena jīvāmi , tena posemi dārake .

117.

‘‘ Deyyadhammo ca me natthi , puññakkhette anuttare ;

Koṭṭhakaṃ upasaṅkamma , udakaṃ paṭṭhapesahaṃ .

118.

‘‘ TenaT2.268 kammena sukatena , tāvatiṃsamagacchahaṃ ;

Tattha me sukataṃ byamhaṃ , udahārena nimmitaṃ .

119.

‘‘ Accharānaṃ sahassassa , ahañhi pavarā tadā ;

Dasaṭṭhānehi tā sabbā , abhibhomi sadā ahaṃ .

120.

‘‘ Paññāsaṃ devarājūnaṃ , mahesittamakārayiṃ ;

Vīsaticakkavattīnaṃ , mahesittamakārayiṃ .

121.

‘‘ Duve bhave saṃsarāmi , devatte atha mānuse ;

Duggatiṃ nābhijānāmi , dakadānassidaṃ phalaṃ .

122.

‘‘ PabbataggeM2.198V2.190 dumagge vā , antalikkhe ca bhūmiyaṃ ;

Yadā udakamicchāmi , khippaṃ paṭilabhāmahaṃ .

123.

‘‘ Avuṭṭhikā disā natthi , santattā kuthitāpi [ santattā kuthitā na ca ( sī . pī .), santattā khuppitā hi me ( syā .)] ca ;

Mama saṅkappamaññāya , mahāmegho pavassati .

124.

‘‘ Kadāci nīyamānāya , ñātisaṅghena me tadā ;

Yadā icchāmahaṃ vassaṃ , mahāmegho ajāyatha .

125.

‘‘ Uṇhaṃ vā pariḷāho vā , sarīre me na vijjati ;

Kāye ca me rajo natthi , dakadānassidaṃ phalaṃ .

126.

‘‘ VisuddhamanasāP2.522 ajja , apetamanapāpikā ;

Sabbāsavaparikkhīṇā , natthi dāni punabbhavo .

127.

‘‘ Ekanavutito kappe , yaṃ dakaṃ adadiṃ tadā ;

DuggatiṃT2.269 nābhijānāmi , dakadānassidaṃ phalaṃ .

128.

‘‘ Kilesā jhāpitā mayhaṃ … pe … viharāmi anāsavā .

129.

‘‘ Svāgataṃ vata me āsi … pe … kataṃ buddhassa sāsanaṃ .

130.

‘‘ Paṭisambhidā catasso … pe … kataṃ buddhassa sāsanaṃ ’’.

Itthaṃ sudaṃ udakadāyikā bhikkhunī imā gāthāyo abhāsitthāti .

Udakadāyikātheriyāpadānaṃ dasamaṃ .

Sumedhāvaggo paṭhamo .

Tassuddānaṃ –

Sumedhā mekhalādāyī , maṇḍapaṃ saṅkamaṃ dadā ;

Naḷamālī piṇḍadadā , kaṭacchu uppalappadā .

Dīpadā dakadā ceva , gāthāyo gaṇitā iha ;

Ekagāthāsatañceva , tiṃsati ca taduttari [ sattarasaṃ taduttari ( syā .), sattādasa taduttariṃ ( pī .)].

Issues

Select Version

Therīapadānapāḷi

Therīapadānapāḷi