5. Nandātherīapadānaṃ
166.
‘‘ Padumuttaro
M2.253 nāma jino , sabbadhammāna pāragū ;Ito satasahassamhi , kappe uppajji nāyako .
167.
‘‘ Ovādako viññāpako , tārako sabbapāṇinaṃ ;
Desanākusalo buddho , tāresi janataṃ bahuṃ .
168.
‘‘ Anukampako
T2.343 kāruṇiko , hitesī sabbapāṇinaṃ ;Sampatte titthiye sabbe , pañcasīle patiṭṭhapi .
169.
‘‘ Evaṃ nirākulaṃ āsi , suññataṃ titthiyehi ca ;
Vicittaṃ arahantehi , vasībhūtehi tādibhi .
170.
‘‘ Ratanānaṭṭhapaññāsaṃ
V2.243 , uggatova mahāmuni ;Kañcanagghiyasaṅkāso , bāttiṃsavaralakkhaṇo .
171.
‘‘ Vassasatasahassāni , āyu vijjati tāvade ;
Tāvatā tiṭṭhamāno so , tāresi janataṃ bahuṃ .
172.
‘‘ Tadāhaṃ haṃsavatiyaṃ , jātā seṭṭhikule ahuṃ ;
Nānāratanapajjote , mahāsukhasamappitā .
173.
‘‘ Upetvā taṃ mahāvīraṃ , assosiṃ dhammadesanaṃ ;
Amataṃ paramassādaṃ , paramatthanivedakaṃ .
174.
‘‘ Tadā nimantayitvāna , sasaṅghaṃ lokanāyakaṃ ;
Datvā tassa mahādānaṃ , pasannā sehi pāṇibhi .
175.
‘‘ Jhāyinīnaṃ
P2.573 bhikkhunīnaṃ , aggaṭṭhānamapatthayiṃ ;Nipacca sirasā dhīraṃ , sasaṅghaṃ lokanāyakaṃ .
176.
‘‘ Tadā adantadamako , tilokasaraṇo pabhū ;
Byākāsi narasārathi ,‘ lacchase taṃ supatthitaṃ .
177.
‘‘‘ Satasahassito kappe , okkākakulasambhavo ;
Gotamo nāma gottena , satthā loke bhavissati .
178.
‘‘‘ Tassa
T2.344 dhammesu dāyādā , orasā dhammanimmitā ;Nandāti nāma nāmena , hessati satthu sāvikā ’.
179.
‘‘ Taṃ
M2.254 sutvā muditā hutvā , yāvajīvaṃ tadā jinaṃ ;Mettacittā paricariṃ , paccayehi vināyakaṃ .
180.
‘‘ Tena kammena sukatena , cetanāpaṇidhīhi ca ;
Jahitvā mānusaṃ dehaṃ , tāvatiṃsamagacchahaṃ .
181.
‘‘ Tato cutā yāmamagaṃ , tatohaṃ tusitaṃ gatā [ agaṃ ( sī . pī . ka .)];
Tato ca nimmānaratiṃ , vasavattipuraṃ tato [ gatā ( syā .)].
182.
‘‘ Yattha yatthūpapajjāmi , tassa kammassa vāhasā ;
Tattha tattheva rājūnaṃ , mahesittamakārayiṃ .
183.
‘‘ Tato cutā manussatte , rājānaṃ cakkavattinaṃ ;
Maṇḍalīnañca rājūnaṃ , mahesittamakārayiṃ .
184.
‘‘ Sampattiṃ
V2.244 anubhotvāna , devesu manujesu ca ;Sabbattha sukhitā hutvā , nekakappesu saṃsariṃ .
185.
‘‘ Pacchime bhave sampatte , suramme [ purasmiṃ ( syā .)] kapilavhaye ;
Rañño suddhodanassāhaṃ , dhītā āsiṃ aninditā .
186.
‘‘ Siriyā [ siriṃva ( sī .), raṃsiriva ( syā .)] rūpiniṃ disvā , nanditaṃ āsi taṃ kulaṃ ;
Tena nandāti me nāmaṃ , sundaraṃ pavaraṃ ahu .
187.
‘‘ Yuvatīnañca sabbāsaṃ , kalyāṇīti ca vissutā ;
Tasmimpi nagare ramme , ṭhapetvā taṃ yasodharaṃ .
188.
‘‘ Jeṭṭho
T2.345 bhātā tilokaggo , pacchimo [ majjhimo ( pī .)] arahā tathā ;Ekākinī gahaṭṭhāhaṃ , mātarā paricoditā .
189.
‘‘‘ Sākiyamhi
P2.574 kule jātā , putte buddhānujā tuvaṃ ;Nandenapi vinā bhūtā , agāre kiṃ nu acchasi .
190.
‘‘‘ Jarāvasānaṃ yobbaññaṃ , rūpaṃ asucisammataṃ ;
Rogantamapicārogyaṃ , jīvitaṃ maraṇantikaṃ .
191.
‘‘‘ Idampi te subhaṃ rūpaṃ , sasīkantaṃ manoharaṃ ;
Bhūsanānaṃ alaṅkāraṃ , sirisaṅghāṭasannibhaṃ .
192.
‘‘‘ Puñjitaṃ
M2.255 lokasāraṃva , nayanānaṃ rasāyanaṃ ;Puññānaṃ kittijananaṃ , ukkākakulanandanaṃ .
193.
‘‘‘ Na cireneva kālena , jarā samadhisessati [ samabhibhossati ( sī . syā .), samadhihessati ( pī .)];
Vihāya gehaṃ kāruññe [ kāruññe ( sī . pī .), pārayhiṃ ( syā .)], cara dhammamanindite ’.
194.
‘‘ Sutvāhaṃ mātu vacanaṃ , pabbajiṃ anagāriyaṃ ;
Dehena na tu cittena , rūpayobbanalāḷitā .
195.
‘‘ Mahatā ca payattena , jhānajjhena paraṃ mama ;
Kātuñca vadate mātā , na cāhaṃ tattha ussukā .
196.
‘‘ Tato mahākāruṇiko , disvā maṃ kāmalālasaṃ [ kamalānanaṃ ( syā .)];
Nibbindanatthaṃ rūpasmiṃ , mama cakkhupathe jino .
197.
‘‘ Sakena ānubhāvena , itthiṃ māpesi sobhiniṃ ;
Dassanīyaṃ suruciraṃ , mamatopi surūpiniṃ .
198.
‘‘ Tamahaṃ
T2.346V2.245 vimhitā disvā , ativimhitadehiniṃ ;Cintayiṃ saphalaṃ meti , nettalābhañca mānusaṃ .
199.
‘‘ Tamahaṃ ehi subhage , yenattho taṃ vadehi me ;
Kulaṃ te nāmagottañca , vada me yadi te piyaṃ .
200.
‘ Na
P2.575 vañcakālo subhage [ pañhakālo subhaṇe ( sī . syā . pī .)], ucchaṅge maṃ nivāsaya ;Sīdantīva mamaṅgāni , pasuppaya muhuttakaṃ ’.
201.
‘‘ Tato sīsaṃ mamaṅke sā , katvā sayi sulocanā ;
Tassā nalāṭe patitā , luddhā [ lūtā ( syā .)] paramadāruṇā .
202.
‘‘ Saha tassā nipātena , piḷakā upapajjatha ;
Pagghariṃsu pabhinnā ca , kuṇapā pubbalohitā .
203.
‘‘ Pabhinnaṃ vadanañcāpi , kuṇapaṃ pūtigandhanaṃ ;
Uddhumātaṃ vinilañca , pubbañcāpi sarīrakaṃ .
204.
‘‘ Sā paveditasabbaṅgī , nissasantī muhuṃ muhuṃ ;
Vedayantī sakaṃ dukkhaṃ , karuṇaṃ paridevayi .
205.
‘‘‘ Dukkhena
M2.256 dukkhitā homi , phusayanti ca vedanā ;Mahādukkhe nimuggamhi , saraṇaṃ hohi me sakhī ’.
206.
‘‘‘ Kuhiṃ vadanasobhaṃ te , kuhiṃ te tuṅganāsikā ;
Tambabimbavaroṭṭhaṃ te , vadanaṃ te kuhiṃ gataṃ .
207.
‘‘‘ Kuhiṃ sasīnibhaṃ vaṇṇaṃ , kambugīvā kuhiṃ gatā ;
Doḷālolāva [ dāmāmālañca ( syā .), dololullāva ( ka .)] te kaṇṇā , vevaṇṇaṃ samupāgatā .
208.
‘‘‘ Makuḷakhārakākārā
T2.347 [ makulamburūhākārā ( sī .), makuḷapadumākārā ( syā .)], kalikāva [ kalasāva ( sī . syā . pī .)] payodharā ;Pabhinnā pūtikuṇapā , duṭṭhagandhittamāgatā .
209.
‘‘‘ Vedimajjhāva sussoṇī [ tanumajjhā puthussoṇī ( sī . syā .), vedimajjhā puthussoṇī ( pī .)], sūnāva nītakibbisā ;
Jātā amejjhabharitā , aho rūpamasassataṃ .
210.
‘‘‘ Sabbaṃ sarīrasañjātaṃ , pūtigandhaṃ bhayānakaṃ ;
Susānamiva bībhacchaṃ , ramante yattha bālisā ’.
211.
‘‘ Tadā
P2.576 mahākāruṇiko , bhātā me lokanāyako ;Disvā saṃviggacittaṃ maṃ , imā gāthā abhāsatha .
212.
‘‘‘ Āturaṃ
V2.246 kuṇapaṃ pūtiṃ , passa nande samussayaṃ ;Asubhāya cittaṃ bhāvehi , ekaggaṃ susamāhitaṃ .
213.
‘‘‘ Yathā idaṃ tathā etaṃ , yathā etaṃ tathā idaṃ ;
Duggandhaṃ pūtikaṃ vāti , bālānaṃ abhinanditaṃ .
214.
‘‘‘ Evametaṃ avekkhantī , rattindivamatanditā ;
Tato sakāya paññāya , abhinibbijjha dakkhasi ’.
215.
‘‘ Tatohaṃ atisaṃviggā , sutvā gāthā subhāsitā ;
Tatraṭṭhitāvahaṃ santī , arahattamapāpuṇiṃ .
216.
‘‘ Yattha yattha nisinnāhaṃ , sadā jhānaparāyanā ;
Jino tasmiṃ guṇe tuṭṭho , etadagge ṭhapesi maṃ .
217.
‘‘ Kilesā jhāpitā mayhaṃ … pe … viharāmi anāsavā .
218.
‘‘ Svāgataṃ
T2.348M2.257 vata me āsi … pe … kataṃ buddhassa sāsanaṃ . 219.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ nandā bhikkhunī janapadakalyāṇī imā gāthāyo abhāsitthāti .
Nandātheriyāpadānaṃ pañcamaṃ .