3. Dhammadinnātherīapadānaṃ
95.
‘‘ Padumuttaro nāma jino , sabbadhammāna pāragū ;
Ito satasahassamhi , kappe uppajji nāyako .
96.
‘‘ Tadāhaṃ haṃsavatiyaṃ , kule aññatare ahuṃ ;
Parakammakārī āsiṃ , nipakā sīlasaṃvutā .
97.
‘‘ Padumuttarabuddhassa , sujāto aggasāvako ;
Vihārā abhinikkhamma , piṇḍapātāya [ pattamādāya ( ka .)] gacchati .
98.
‘‘ Ghaṭaṃ gahetvā gacchantī , tadā udakahārikā ;
Taṃ disvā adadaṃ pūpaṃ , pasannā sehi pāṇibhi .
99.
‘‘ Paṭiggahetvā tattheva , nisinno paribhuñji so ;
Tato netvāna taṃ gehaṃ , adāsiṃ tassa bhojanaṃ .
100.
‘‘ Tato
M2.248 me ayyako tuṭṭho , akarī suṇisaṃ sakaṃ ;Sassuyā saha gantvāna , sambuddhaṃ abhivādayiṃ .
101.
‘‘ Tadā so dhammakathikaṃ , bhikkhuniṃ parikittayaṃ ;
Ṭhapesi etadaggamhi , taṃ sutvā muditā ahaṃ .
102.
‘‘ Nimantayitvā
P2.568 sugataṃ , sasaṅghaṃ lokanāyakaṃ ;Mahādānaṃ daditvāna , taṃ ṭhānamabhipatthayiṃ .
103.
‘‘ Tato
T2.336 maṃ sugato āha , ghananinnādasussaro [ ghananinnādasussare ( ka .)];‘ Mamupaṭṭhānanirate , sasaṅghaparivesike .
104.
‘‘‘ Saddhammassavane
V2.238 yutte , guṇavaddhitamānase ;Bhadde bhavassu muditā , lacchase paṇidhīphalaṃ .
105.
‘‘‘ Satasahassito kappe , okkākakulasambhavo ;
Gotamo nāma gottena , satthā loke bhavissati .
106.
‘‘‘ Tassa dhammesu dāyādā , orasā dhammanimmitā ;
Dhammadinnāti nāmena , hessati satthu sāvikā ’.
107.
‘‘ Taṃ sutvā muditā hutvā , yāvajīvaṃ mahāmuniṃ ;
Mettacittā paricariṃ , paccayehi vināyakaṃ .
108.
‘‘ Tena kammena sukatena , cetanāpaṇidhīhi ca ;
Jahitvā mānusaṃ dehaṃ , tāvatiṃsamagacchahaṃ .
109.
‘‘ Imamhi bhaddake kappe , brahmabandhu mahāyaso ;
Kassapo nāma gottena , uppajji vadataṃ varo .
110.
‘‘ Upaṭṭhāko mahesissa , tadā āsi narissaro ;
Kāsirājā kikī nāma , bārāṇasipuruttame .
111.
‘‘ Chaṭṭhā tassāsahaṃ dhītā , sudhammā iti vissutā ;
Dhammaṃ sutvā jinaggassa , pabbajjaṃ samarocayiṃ .
112.
‘‘ Anujāni na no tāto , agāreva tadā mayaṃ ;
Vīsavassasahassāni , vicarimha atanditā .
Tatiyaṃ bhāṇavāraṃ .
113.
‘‘ Komāribrahmacariyaṃ
T2.337M2.249 , rājakaññā sukhedhitā ;Buddhopaṭṭhānaniratā , muditā satta dhītaro .
114.
‘‘ Samaṇī samaṇaguttā ca , bhikkhunī bhikkhudāyikā ;
Dhammā ceva sudhammā ca , sattamī saṅghadāyikā .
115.
‘‘ Khemā uppalavaṇṇā ca , paṭācārā ca kuṇḍalā ;
Gotamī ca ahañceva , visākhā hoti sattamī .
116.
‘‘ Tehi kammehi sukatehi , cetanāpaṇidhīhi ca ;
Jahitvā mānusaṃ dehaṃ , tāvatiṃsamagacchahaṃ .
117.
‘‘ Pacchime
V2.239P2.569 ca bhave dāni , giribbajapuruttame ;Jātā seṭṭhikule phīte , sabbakāmasamiddhine .
118.
‘‘ Yadā rūpaguṇūpetā , paṭhame yobbane ṭhitā ;
Tadā parakulaṃ gantvā , vasiṃ sukhasamappitā .
119.
‘‘ Upetvā lokasaraṇaṃ , suṇitvā dhammadesanaṃ ;
Anāgāmiphalaṃ patto , sāmiko me subuddhimā .
120.
‘‘ Tadāhaṃ anujānetvā , pabbajiṃ anagāriyaṃ ;
Na cireneva kālena , arahattamapāpuṇiṃ .
121.
‘‘ Tadā upāsako so maṃ , upagantvā apucchatha ;
Gambhīre nipuṇe pañhe , te sabbe byākariṃ ahaṃ .
122.
‘‘ Jino tasmiṃ guṇe tuṭṭho , etadagge ṭhapesi maṃ ;
‘ Bhikkhuniṃ dhammakathikaṃ , nāññaṃ passāmi edisiṃ .
123.
‘ Dhammadinnā
T2.338 yathā dhīrā , evaṃ dhāretha bhikkhavo ’;‘‘ Evāhaṃ paṇḍitā homi [ jātā ( sī .), nāma ( syā .)], nāyakenānukampitā .
124.
‘‘ Pariciṇṇo mayā satthā , kataṃ buddhassa sāsanaṃ ;
Ohito garuko bhāro , bhavanetti samūhatā .
125.
‘‘ Yassatthāya pabbajitā , agārasmānagāriyaṃ ;
So me attho anuppatto , sabbasaṃyojanakkhayo .
126.
‘‘ Iddhīsu
M2.250 ca vasī homi , dibbāya sotadhātuyā ;Paracittāni jānāmi , satthusāsanakārikā .
127.
‘‘ Pubbenivāsaṃ jānāmi , dibbacakkhu visodhitaṃ ;
Khepetvā āsave sabbe , visuddhāsiṃ sunimmalā .
128.
‘‘ Kilesā jhāpitā mayhaṃ … pe … viharāmi anāsavā .
129.
‘‘ Svāgataṃ vata me āsi … pe … kataṃ buddhassa sāsanaṃ .
130.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ dhammadinnā bhikkhunī imā gāthāyo abhāsitthāti .
Dhammadinnātheriyāpadānaṃ tatiyaṃ .