5. Suvaṇṇapupphiyattheraapadānavaṇṇanā
Vipassī
M2.132 nāma bhagavātiādikaṃ āyasmato suvaṇṇapupphiyattherassaP0.421 apadānaṃ .Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ ṭhāne bhūmaṭṭhakadevaputto hutvā nibbatto tassa bhagavato dhammaṃ sutvā pasannamānaso catūhi suvaṇṇapupphehi pūjesi .
Tāni pupphāni ākāse suvaṇṇavitānaṃ hutvā chādesuṃ , suvaṇṇapabhā ca buddhassa sarīrapabhā ca ekato hutvā mahāobhāso ahosi .
So atirekataraṃ pasanno sakabhavanaṃ gatopi saratiyeva .
So tena puññakammena tusitabhavanādisugatīsuyeva saṃsaranto dibbasampattiṃ anubhavitvā imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā sāsane uraṃ datvā pabbajito nacirasseva arahā ahosi .
40. So aparabhāge pubbakammaṃ saritvā somanassajāto attano pubbacaritāpadānaṃ pakāsento vipassī nāma bhagavātiādimāha .
Taṃ heṭṭhā vuttatthameva .
44. Pāmojjaṃ janayitvānāti balavapītiṃ uppādetvā ‘‘ pāmojjaṃ āmodanā pamodanā hāso
V2.124 pahāso vitti odagyaṃ attamanatā cittassā ’’ tiādīsu ( dha . sa .9,86; mahāni .1) viya attamanatā sakabhāvaṃ uppādetvāti attho .Sesaṃ sabbattha uttānamevāti .
Suvaṇṇapupphiyattheraapadānavaṇṇanā samattā .