10. Duccaritavipākasuttavaṇṇanā
40. Dasame pāṇātipātoti pāṇātipātacetanā .
Sabbalahusoti sabbalahuko .
Appāyukasaṃvattanikoti tena parittakena kammavipākena appāyuko hoti , dinnamattāya vā paṭisandhiyā vilīyati mātukucchito nikkhantamatte vā .
Evarūpo hi na aññassa kassaci nissando , pāṇātipātasseva gatamaggo esoti .
Bhogabyasanasaṃvattanikoti yathā kākaṇikāmattampi
V3.231 hatthe na tiṭṭhati , evaṃ bhogabyasanaṃ saṃvatteti .Sapattaverasaṃvattaniko hotīti saha sapattehi veraṃ saṃvatteti .
Tassa hi sapattā ca bahukā honti .
Yo ca naṃ passati , tasmiṃ verameva uppādeti na nibbāyati .
Evarūpo hi parassa rakkhitagopitabhaṇḍe aparādhassa nissando .
Abhūtabbhakkhānasaṃvattaniko hotīti abhūtena abbhakkhānaṃ saṃvatteti , yena kenaci kataṃ tasseva upari patati .
Mittehi
P4.129 bhedanasaṃvattanikoti mittehi bhedaṃ saṃvatteti .
Yaṃ yaṃ mittaṃ karoti , so so bhijjatiyeva .Amanāpasaddasaṃvattanikoti amanāpasaddaṃ saṃvatteti .
Yā sā vācā kaṇṭakā kakkasā kaṭukā abhisajjanī mammacchedikā , gatagataṭṭhāne tameva suṇāti , manāpasaddasavanaṃ nāma na labhati .
Evarūpo pharusavācāya gatamaggo nāma .
Anādeyyavācāsaṃvattanikoti aggahetabbavacanataṃ saṃvatteti ,‘‘ tvaṃ kasmā kathesi , ko hi tava vacanaṃ gahessatī ’’ ti vattabbataṃ āpajjati .
Ayaṃ samphappalāpassa gatamaggo .
Ummattakasaṃvattaniko hotīti ummattakabhāvaṃ
M3.233 saṃvatteti .
Tena hi manusso ummatto vā khittacitto vā eḷamūgo vā hoti .
Ayaṃ surāpānassa nissando .Imasmiṃ sutte vaṭṭameva kathitanti .
Dānavaggo catuttho .