10. Mogharājattheraapadānaṃ

Author： _System_Pali_VRI_ @ Administrator

10. Mogharājattheraapadānaṃ

327.

‘‘ Padumuttaro nāma jino , sabbalokavidū muni ;

Ito satasahassamhi , kappe uppajji cakkhumā .

328.

‘‘ Ovādako viññāpako , tārako sabbapāṇinaṃ ;

Desanākusalo buddho , tāresi janataṃ bahuṃ .

329.

‘‘ Anukampako kāruṇiko , hitesī sabbapāṇinaṃ ;

Sampatte titthiye sabbe , pañcasīle patiṭṭhapi .

330.

‘‘ Evaṃ nirākulaṃ āsi , suññataṃ titthiyehi ca ;

Vicittaṃ arahantehi , vasībhūtehi tādibhi .

331.

‘‘ RatanānaṭṭhapaññāsaṃM2.140 , uggato so mahāmuni ;

Kañcanagghiyasaṅkāso , bāttiṃsavaralakkhaṇo .

332.

‘‘ VassasatasahassāniV2.136 , āyu vijjati tāvade ;

Tāvatā tiṭṭhamāno so , tāresi janataṃ bahuṃ .

333.

‘‘ TadāhaṃT2.215 haṃsavatiyaṃ , kule aññatare ahuṃ ;

Parakammāyane yutto , natthi me kiñci saṃdhanaṃ .

334.

‘‘ Paṭikkamanasālāyaṃ , vasanto katabhūmiyaṃ ;

Aggiṃ ujjālayiṃ tattha , daḷhaṃ kaṇhāsi sā [ kaṇhā siyā ( sī . pī .), ḍayhakaṇhā silā ( syā .)] hī .

335.

‘‘ Tadā parisatiṃ nātho , catusaccapakāsako ;

Sāvakaṃ sampakittesi , lūkhacīvaradhārakaṃ .

336.

‘‘ Tassa tamhi guṇe tuṭṭho , paṇipacca [ patipajja ( syā .)] tathāgataṃ ;

Lūkhacīvaradhāraggaṃ , patthayiṃ ṭhānamuttamaṃ .

337.

‘‘ Tadā avoca bhagavā , sāvake padumuttaro ;

‘ Passathetaṃ purisakaṃ , kucelaṃ tanudehakaṃ .

338.

‘‘‘ PītippasannavadanaṃP2.487 , saddhādhanasamanvitaṃ [ saddhāsnehasamanvataṃ ( ka .)];

Udaggatanujaṃ haṭṭhaṃ , acalaṃ sālapiṇḍitaṃ .

339.

‘‘‘ Eso pattheti taṃ ṭhānaṃ , saccasenassa bhikkhuno ;

Lūkhacīvaradhārissa , tassa vaṇṇasitāsayo [ vaṇṇagatāsayo ( sī . syā . pī .)].

340.

‘‘ Taṃ sutvā mudito hutvā , nipacca sirasā jinaṃ ;

Yāvajīvaṃ subhaṃ kammaṃ , karitvā jinasāsane .

341.

‘‘ Tena kammena sukatena , cetanāpaṇidhīhi ca ;

Jahitvā mānusaṃ dehaṃ , tāvatiṃsūpago ahaṃ .

342.

‘‘ Paṭikkamanasālāyaṃ , bhūmidāhakakammunā ;

Samasahassaṃ niraye , adayhiṃ vedanāṭṭito .

343.

‘‘ TenaT2.216 kammāvasesena , pañca jātisatānihaṃ ;

Manusso kulajo hutvā , jātiyā lakkhaṇaṅkito .

344.

‘‘ PañcaM2.141 jātisatāneva , kuṭṭharogasamappito ;

Mahādukkhaṃ anubhaviṃ , tassa kammassa vāhasā .

345.

‘‘ Imasmiṃ bhaddake kappe , upariṭṭhaṃ yasassinaṃ ;

Piṇḍapātena tappesiṃ , pasannamānaso ahaṃ .

346.

‘‘ TenaV2.137 kammavisesena , cetanāpaṇidhīhi ca ;

Jahitvā mānusaṃ dehaṃ , tāvatiṃsamagacchahaṃ .

347.

‘‘ Pacchime bhave sampatte , ajāyiṃ khattiye kule ;

Pituno accayenāhaṃ , mahārajjasamappito .

348.

‘‘ Kuṭṭharogādhibhūtohaṃ , na ratiṃ na sukhaṃ labhe ;

Moghaṃ rajjaṃ sukhaṃ yasmā , mogharājā tato ahaṃ .

349.

‘‘ Kāyassa dosaṃ disvāna , pabbajiṃ anagāriyaṃ ;

Bāvarissa dijaggassa , sissattaṃ ajjhupāgamiṃ .

350.

‘‘ Mahatā parivārena , upecca naranāyakaṃ ;

Apucchiṃ nipuṇaṃ pañhaṃ , taṃ vīraṃ vādisūdanaṃ .

351.

‘‘‘ Ayaṃ loko paro loko , brahmaloko sadevako ;

Diṭṭhiṃ no [ diṭṭhā no ( sī .), diṭṭhaṃ no ( pī .), diṭṭhiṃ te ( syā .)] nābhijānāmi , gotamassa yasassino .

352.

‘‘‘ EvābhikkantadassāviṃP2.488 , atthi pañhena āgamaṃ ;

Kathaṃ lokaṃ avekkhantaṃ , maccurājā na passati ’.

353.

‘‘‘ SuññatoT2.217 lokaṃ avekkhassu , mogharāja sadā sato ;

Attānudiṭṭhiṃ uhacca , evaṃ maccutaro siyā .

354.

‘‘‘ Evaṃ lokaṃ avekkhantaṃ , maccurājā na passati ’;

Iti maṃ abhaṇi buddho , sabbarogatikicchako .

355.

‘‘ Saha gāthāvasānena , kesamassuvivajjito ;

Kāsāvavatthavasano , āsiṃ bhikkhu tathārahā .

356.

‘‘ Saṅghikesu vihāresu , na vasiṃ rogapīḷito ;

Mā vihāro padussīti , vātarogehi pīḷito [ vācāyābhisupīḷito ( syā . pī .), vātarogī supīḷito ( ka .)].

357.

‘‘ SaṅkārakūṭāM2.142 āhitvā , susānā rathikāhi ca ;

Tato saṅghāṭiṃ karitvā , dhārayiṃ lūkhacīvaraṃ .

358.

‘‘ Mahābhisakko tasmiṃ me , guṇe tuṭṭho vināyako ;

Lūkhacīvaradhārīnaṃ , etadagge ṭhapesi maṃ .

359.

‘‘ Puññapāpaparikkhīṇo , sabbarogavivajjito ;

Sikhīva anupādāno , nibbāyissamanāsavo .

360.

‘‘ KilesāV2.138 jhāpitā mayhaṃ … pe … viharāmi anāsavo .

361.

‘‘ Svāgataṃ vata me āsi … pe … kataṃ buddhassa sāsanaṃ .

362.

‘‘ Paṭisambhidā catasso … pe … kataṃ buddhassa sāsanaṃ ’’.

ItthaṃT2.218 sudaṃ āyasmā mogharājā thero imā gāthāyo

Abhāsitthāti .

Mogharājattherassāpadānaṃ dasamaṃ .

Kaccāyanavaggo catupaññāsamo .

Tassuddānaṃ –

Kaccāno vakkalī thero , mahākappinasavhayo ;

Dabbo kumāranāmo ca , bāhiyo koṭṭhiko vasī .

Uruveḷakassapo rādho , mogharājā ca paṇḍito ;

Tīṇi gāthāsatānettha , bāsaṭṭhi ceva piṇḍitā .

Issues

Select Version

Therāpadānapāḷi

Therāpadānapāḷi