6. Sevanāsuttavaṇṇanā
6. Chaṭṭhe
M3.284 jīvitasambhārāti jīvitappavattiyā sambhārā paccayā .Samudānetabbāti sammā ñāyena anavajjauñchācariyādinā uddhamuddhamānetabbā pāpuṇitabbā .
Te pana samudānitā samāhatā nāma hontīti āha ‘‘ samāharitabbā ’’ ti .
Dukkhena uppajjantīti sulabhuppādā na honti .
Etena gocaraasappāyādibhāvaṃ dasseti .
Rattibhāgaṃ vā divasabhāgaṃ vāti bhummatthe upayogavacananti āha ‘‘ rattikoṭṭhāse vā divasakoṭṭhāse vā ’’ ti .
Rattiṃyeva pakkamitabbaṃ samaṇadhammassa tattha anipphajjanato .
Saṅkhāpīti ‘‘ yadatthamahaṃ pabbajito , na metaṃ idha nipphajjati , cīvarādi pana samudāgacchati , nāhaṃ tadatthaṃ pabbajito , kiṃ me idha vāsenā ’’ ti paṭisaṅkhāyapi .
Tenāha ‘‘ sāmaññatthassa bhāvanāpāripūriagamanaṃ jānitvā ’’ ti .
Anantaravāre saṅkhāpīti samaṇadhammassa nipphajjanabhāvaṃ jānitvā .
So puggalo anāpucchā pakkamitabbaṃ , nānubandhitabboti ‘‘ so puggalo ’’ ti padassa ‘‘ nānubandhitabbo ’’ ti iminā sambandho .
Yassa yena hi sambandho , dūraṭṭhenapi so bhavati .
Taṃ puggalan ti so puggaloti paccattavacanaṃ upayogavasena pariṇāmetvā taṃ puggalaṃ anāpucchā pakkamitabbanti attho .
Atthavasena hi vibhattipariṇāmoti .
Āpucchā pakkamitabban ti ca kataññukataveditāya niyojanaṃ .
Evarūpoti yaṃ
V3.263 nissāya bhikkhuno guṇehi vuddhiyeva pāṭikaṅkhā , paccayehi na parissayo , evarūpo daṇḍakammādīhi niggaṇhāti cepi , na pariccajitabboti dasseti ‘‘ sacepī ’’ tiādinā .Sevanāsuttavaṇṇanā niṭṭhitā .