( Ka ) anulomapuggalo
19.( Ka ) yassa
V2.10 kāyasaṅkhāro uppajjati tassa vacīsaṅkhāro uppajjatīti ?Vinā vitakkavicārehi assāsapassāsānaṃ uppādakkhaṇe tesaṃ kāyasaṅkhāro uppajjati , no ca tesaṃ vacīsaṅkhāro uppajjati .
Paṭhamajjhānaṃ samāpannānaṃ kāmāvacarānaṃ assāsapassāsānaṃ uppādakkhaṇe tesaṃ kāyasaṅkhāro ca uppajjati vacīsaṅkhāro ca uppajjati .
( Kha ) yassa vā pana vacīsaṅkhāro uppajjati tassa kāyasaṅkhāro uppajjatīti ?
Vinā assāsapassāsehi vitakkavicārānaṃ uppādakkhaṇe tesaṃ vacīsaṅkhāro uppajjati , no ca tesaṃ kāyasaṅkhāro uppajjati .
Paṭhamajjhānaṃ samāpannānaṃ kāmāvacarānaṃ assāsapassāsānaṃ uppādakkhaṇe tesaṃ vacīsaṅkhāro ca uppajjati kāyasaṅkhāro ca uppajjati .
( Ka ) yassa kāyasaṅkhāro uppajjati tassa cittasaṅkhāro uppajjatīti ?
Āmantā .
( Kha ) yassa vā pana cittasaṅkhāro uppajjati tassa kāyasaṅkhāro uppajjatīti ?
Vinā assāsapassāsehi cittassa uppādakkhaṇe tesaṃ cittasaṅkhāro uppajjati , no ca tesaṃ kāyasaṅkhāro uppajjati .
Assāsapassāsānaṃ uppādakkhaṇe tesaṃ cittasaṅkhāro ca uppajjati kāyasaṅkhāro ca uppajjati .
20.( Ka ) yassa vacīsaṅkhāro uppajjati tassa cittasaṅkhāro uppajjatīti ?
Āmantā .
( Kha ) yassa vā pana cittasaṅkhāro uppajjati tassa vacīsaṅkhāro uppajjatīti ?
Vinā vitakkavicārehi cittassa uppādakkhaṇe tesaṃ cittasaṅkhāro uppajjati , no ca tesaṃ vacīsaṅkhāro uppajjati .
Vitakkavicārānaṃ uppādakkhaṇe tesaṃ cittasaṅkhāro ca uppajjati vacīsaṅkhāro ca uppajjati .